The greatest WordPress.com site in all the land!

Posts tagged ‘మగవాళ్ళు’

దుర్యోధన దుశ్శాసన పర్వమూలాలెక్కడ .. ? నీలోనే …

నేను నిరుపేద ఆడపిల్లను
నేను కులసోపానంలో కింద ఉన్న బాధితను
నిత్యం దుర్యోధన దుశ్శాసన పర్వం లో చిక్కిన సమిధను
అందుకే
ఆ జాడ లేని లోకం కోసం డేగకళ్ళతో గాలించా
ఏదీ .. ఎక్కడా అగుపించదే ?
మూలం ఏమిటని, ఎక్కడుందని
మూడో కన్ను తెరిచి
ముల్లోకాలూ అన్వేషించా
అర్ధమయింది !
మగవాళ్ళు ఎప్పటికీ మగవాళ్ళే …
ఆ మాత్రం కుర్రతనపు ఆకతాయి చేష్టలుండవా.. ?
అనే
నీ తత్వంలోనే ఉంది అసలు లోపం
ఆనాటి నుండి ఈ నాటివరకూ ..
నీ ఆధిపత్య భావనలోనే ఉంది అసలు దోషం
నేను దోషాలకు నిలయం అంటూ
నా ఆడతనానికి మరకలు వేసే నువ్వే ..
నాపై నిఘా .. అనేకానేక హద్దులూ ..
ఆంక్షలు .. ఏర్పరచే నువ్వే
నియమాలూ , విధులూ ఏర్పరచి
నన్నేదో ఉద్దరిస్తున్నట్లు , రక్షిస్తున్నట్లు
జాగ్రత్తగా చూసుకుంటున్నట్లు ఫోజులిస్తూ
ఒరిపిడి రాయిపై పరీక్షలు చేసేది నువ్వే
అవును మరి !
ఆ శ్రీ రామచంద్రుని వారసులు కదా !!!
నా స్వభావం .. నా చర్యలు పాపిస్టివంటూ
నేను విశ్వసించదగిన దాన్ని కాదని ప్రచారం చేసే నువ్వే
నా ఆత్మ గౌరవాన్ని దెబ్బతీసి
నా గర్భస్థానాన్ని అనకొండలా ఆక్రమించేసి
అది నీ మగతనంగా విర్ర వీగుతావు
అదేనీవు
అత్యాచారం స్త్రీకి మరణం కంటే హేయం అంటావు
అనైతిక ప్రవర్తనతోఎగిసిపడే నువ్వే
నీ శీలానికి లేని పవిత్రత నా శీలానికి అంటగట్టి
నా జీవితాన్ని రాబందులా కరచిపట్టి
నన్ను సమిధను చేస్తావు
నీ ఆటలు సాగనివ్వకపోతే సహించలేవు
బలసిన కొండచిలువలా బుసకొడతావు
అహంకారంతో అరాచకం సృస్టిస్తావు
పట్టపగలు పదుగురి ఎదుటే
వివస్త్రను చేసి నిస్సిగ్గుగా
సాముహిక అత్యాచారం చేస్తావు
నడివీధిలో తుపాకితో కాల్చేస్తావు
శవాల తివాచీ పరుస్తావు
అవును మరి
తాటక వధ నీ నిర్వాకమేగా !
శుర్పణఖ చెవులు ముక్కు కోసిన ఘనత నీదేగా !!
తోడేళ్ళలా పడి నా మర్మస్థానం పై దాడిచేయడం
బానిసను చేసి లోబరుచుకోవడం ,
అడవుల పాలు చేయడం
అమ్మకానికి పెట్టడం నీకు కొత్తేమీ కాదుగా.. !
పురాణకాలం నుంచి చూస్తున్నదేగా !!
నా వ్యవహారంలో పెత్తందారులా వ్యవహరించి
నా ఆలోచనా స్రవంతిని నియంత్రించి
నా ఉద్వేగాలను భావాలను ప్రతిఘటించి
నా సామాజిక ధర్మాలను నిర్ధారించి
నా నీతి న్యాయం నిర్ణయించి
తీర్పు చెప్పే వారిగా స్థిరపరచే నువ్వు
నా శ్రమను కొల్లగొడుతూ
నా శ్రమ ఫలితాలను అపహరిస్తూ
నా ఆశలను , అభిలాషలను కాలరాస్తూ
నాపై నాకే అంతరం సృష్టించే నువ్వు
నన్ను, నీకు విశ్వాసంగా బతకాలంటావు
నా గర్భస్థలం ఆక్రమించి
నాకు గర్భాదానం చేశానని
వారసులపై హక్కు ప్రకటించి
కాకీవనపు కరకు గాలిలో బంధించాలనుకుంటావు
ఇలా ఎన్నాళ్ళు .. ఎన్నేళ్ళు
ఇకపై సాగవు నీ ఆగడాలు
నీ ఒంటెద్దు పోకడలు తుంగలో తోక్కి
సమాజాభివృద్ధికి సమానాభివృద్దికి
నూతన సంస్కృతికి తోవ చూపుతా
స్త్రీ విముక్తి మార్గాలు వెతుకుతా
తళుకు బెళుకుల గాజురాయిలా కాదు
నిగ నిగలాడే నిక్కమైన నీలమణిలా మెరుస్తా
అంటూ ముల్లోకాలూ చాటింపు వేస్తా
ఆశ్చర్యంగా ఉందా .. ?
అవును నిజంగా నీకు ఆశ్చర్యాన్నే .,!!
నా రూపు మార్చుకుంటూ ..
నా ఉనికికి గుర్తింపునిచ్చుకుంటూ…
చీదరించుకునే నోళ్లను మూయిస్తూ…
సున్నా నుంచీ ప్రశ్నార్ధకంగా.. ఆశ్చర్యార్ధకంగా మారిపోతూ..
నా అస్తిత్వానికి ఓ అర్ధం ఏర్పరచుకుంటూ.. సాగిపోతుంటా ..

– వి. శాంతి ప్రబోధ

(published in July 2014 Vihanga Web magazine)

Tag Cloud

%d bloggers like this: